Kalibo Aklan ——-Kasunod it mga nagatuhaw nga balita ag post sa social media angot sa German National nga presenteng naga-istar sa parte it San Jose, Romblon ag sa makarun hay nagpositibo sa coronavirus disease ukon COVID-19 matapos ma-confine sa Aklan Provincial Hospital, nagtao it pagklaro ro unga kara nga owa eon ginpangaeanan
Suno sa pagpahayag it unga kara, maghalin sigon ro anang ama sa Manila apang antes pa man nagdeklara it Enhanced Community Quarantine idto hay nakauli eon raya.
Ginpabutyag man kara nga masami nga maka-experiensya it pag-ubo ro anang ama rason nga naging normal eamang raya para kanda.
Apang, kat matueopangdan sigon kara nga samtang nagabuhay ro sintomas nga ubo it anang ama, ginpakamayad lang kara nga pabisitahan anay raya sa kakilaea ukon bantay sa andang baeay.
Dugang pa kara, ginreport eon man sigon nanda sa barangay nga maghalin raya sa Manila kung sa siin ginkabig man nga sambilog sa under monitoring.
Samtang sa pihak nga parte, matapos sigon ro 14 days nga home quarantine it anang ama hay mas naglala pa sigon ro ginabatyag karang pag-ubo hasta sa indi eon makakaon.
Bangud kara, nagdesidir sigon sanda nga daehon sa ospital ro ama kung sa siin ginkontak kara ro sangka health worker sa andang municipal hospital ag ginpakigbahin ro kondisyon it anang ama.
Owa man sigon sanda nagkueang sa pagpadumdom nga may travel history ro anang ama sa Manila kung sa siin may nauna eon nga nailistang COVID-19 cases.
