POLICE Report — Puno it nina ag gaob ro eawas it sangka 8-anyos nga ungang eaeaki matapos nga kabuliganan nga sakiton it anang kaugalingon nga ina ag lola kat owa eagi nakabalik matapos nga sugu-on nga magbakae it sigarilyo.
Sa kustodiya makaron it Rodriguez City Social Welfare and Development (DSWD) ro unga matapos nga taw-an it nagakaigo nga pagbueong ro mga naangkon nga gaob sa eawas.
Nakakulong eon man sa lock-up cell it Rodriguez Rizal Police ro mag-ina ag nagapangatubang sa kasong child abuse ag physical abuse.
Sa imbestigasyon it kapulisan, antes ro insidente hay ginsugo ro unga it anang ina nga magbakae it sigarilyo sa baraka apang owa eon raya nakabalik pa sa andang baeay.
Pag-abot it alas-5, nakita it ina ro unga ag ginpa-uli hasta nga ginbinayo raya sa ueo ag iba pa nga parte it anang eawas.
Pilang kaeapitbaeay man ro nakakita sa hitabu ag naboe-an it video ag dayun nga gin-post sa social media nga nagresulta sa pagkadakop sa mag-ina.
Depensa it ina, sa sobrang kaakig ro anang nabatyagan sa anang unga rason nga hasakit nana raya eabi pa kat naghana raya nga magdaeagan tuga man it anang pagnabdos nga una eon sa ikatlong buean.
Apang, ginpahayag it mga kaeapitbaeay nga pirme nga ginabugbog ro unga it anang ina ag lola rason nga kon amat hay matsa nahadlok eon nga mag-uli raya sa andang baeay.
