Sangka 11-anyos nga unga sa China ro naglayas ag nagbisikleta it 130 kilometers matapos akigan it anang ina.
Suno sa report, owa it pundo nga nagbisikleta ro ungang eaeaki sa sueod it 22 oras halin sa Hangzhou paagto sa Mejiang.
Nag umpisa ro insidente kat maakigan ro owa ginpangaeanan nga ungang eaeaki it anang ina.
Nagpaandam ro ungang eaeaki nga magalayas ag maga istar eon lang sa anang lola.
Owa gin seryoso it anang ina ro paeag bangud nga maeayo ro lugar it anang lola
Owa ginaeauman it ina nga paga seryosohon it unga ro paglayas.
Sakay ro bisikleta, masobra sa 22 oras nga nagbiyahe ro unga ag nagpundo eamang raya kat owa eon nasarangan it anang siki ro pag-pedal.
Gabi-i it Abril 2 kat makita it mga motorista ro unga nga sa kilid it sangka expressway tunnel ag insigidang nagtawag ro mga raya it pulis.
Kat ginpangutana it mga pulis kun siin raya naghalin, nakibot ro mga raya bangud sa maeayo ro anang ginhalinan.
Suno sa pulis nga nag responde sa unga, sa sobrang gaoy ag sakit it siki it unga, ginkinahangean raya nga hakwaton it pulis agud nga isakay sa police car.
Gindaea ro unga sa police station agud nga makakaon ag magpahuway.
Dugang pa it mga pulis , inabot it 22 hours ro pagbisikleta it unga bangud nga nagtaeang raya ag saea saea nga highway ro anang gin agihan.
Owa it nasayuran ro unga nga haeos sang oras eon lang ro anang igabiyahe ag maabot eon ro baeay it anang lola.
Natukiban pa nga samtang nagabiyahe , naka-survive sa tinapay ag tubi ro unga nga anang baeon halin sa andang baeay.
Dungan nga ginsueang ro unga it anang mga ginikanan ag lola sa police station.
