Sangka unga nga eaeaki sa Bangladesh ro himalang nakaeowas matapos makulong it an-um nga adlaw sa sangka shipping container bangud sa paghampang it paeanaguan.
Nakibot ro mga trabahador sa Port Klang sa Malaysia kat may makit-an sanda nga unga sa sueod it shipping container nga naghalin sa sangka Bangladeshi vessel.
Bangud nga iba ro lengguwahe it unga, owa it mabo-oe nga impormasyon ro mga Malaysian port authorities halin kana.
Ro unang pagduda it mga awtoridad hay biktima ro unga it human trafficking rason nga insigida sanda nga nagtawag it pulis.
Kat maka-usoy it interpreter, nasayuran nga ro unga hay nagahingaean kay “Fahim” ag naghalin sa Chittagong, Bangladesh.
Ginsaysay kara nga nagahampang sanda it paeanaguan.
Ginpili kara nga magpanago sa shipping container ag samtang ginahueat ro mga kahampang nga mausoy imaw, nakatueugan imaw sa sueod kara.
Nabugtaw si Fahim nga naka-lock eon ro container ag an-um nga adlaw imaw nga nakulong sa sueod samtang nagabiyahe ro barko paagto sa Malaysia.
Matapos makit-an it mga trabahador sa pier, insigidang gindaea si Fahim sa ospital.
Dehydrated si Fahim bangud nga owa raya it kinaon ag gin-inom sa sueod it an-um nga adlaw apang mag-eowas kara maayos man ro anang ikamayad nga eawas.
Suno sa Malaysian authorities, indi eon sanda magapatigayon it mas madaeum nga pag-imbestiga bangud nga nagapati sanda sa istorya ni Fahim.
Pagkatapos it full recovery kara hay pagapauli-on eon imaw sa anang nasyon.
