KALIBO, Aklan—Gin-engganyo ni incoming Regional Director PBGEN Rolando Miranda ro publiko nga indi magkahadlok nga magtao it impormasyon sa andang taeatapan kung may matueopangdan nga miyembro it kapulisan nga naga-ubra it saea nga mga hilimuon.
Suno sa opisyal, owa sigon imaw it pagasantuhon maskin pulis pa ro sa likod it mga krimen ag iba pang maeain nga butang eabi eon kung ro alegasyon hay mapamatud-an.
Paga-ubrahon eamang sigon nana ro tama agud malikawan ro pag-abuso sa serbisyo.
Ginapangayo man kara ro kooperasyon it publiko nga makipagbueoligan sa mga kapulisan agud mapabilin ro katawhayan sa bilog nga rehiyon.
Pagatutukan man sigon nana ro may kaangtanan sa illegal nga droga, kurapsyon ag insurgency sa unang duty it anang bag-ong assignment.
Ginpasiguro man it opisyal nga pagataw-an kara it aksyon ro mga pulis nga nagahimo it illegal nga aktibidad partikular ro pagsugae ag pagsangla it service firearms halin sa gobyerno.
Nasayuran nga si Miranda hay miyembro it PMA Class Bigkis Lahi 1990 nga naging chief it Manila Police District ag residente it San Miguel, Bulacan.
Si Miranda hay magabaylo kay outgoing PBGEN Rene Pamuspusan nga gin-assign bilang Deputy Director it Directorate for Plans sa Camp Crame.
Ro Change of Command Ceremony it nasambitang mga opisyal hay nakataeana makaron nga adlaw, Disyembre 2 sa Camp Delgado nga pagatambungan ni PLTGEN Cesar Hawthorne Binag, Deputy Chief PNP for Operation.
