KALIBO, Aklan — Naging madinaeag-on ro ginpatigayon nga Unity Walk ag Peace Covenant Signing, agahon it Lunes, Pebrero 24 sa Kalibo Pastrana Park auditorium.
Suno kay Chrispin Raymund Gerardo, tagapaghambae it Commission on Elections (Comelec) Aklan nga ro aktibidad hay ginpangunahan ni Bishop Jose Corazon Talaoc pinaagi sa pagpatigayon anay it santos nga misa sa St. John The Baptist cathedral.
Haeos tanan man sigon nga mga gin-imbitahan nga kandidato it provincial level ag banwa it Kalibo hay nagtambong sa event.
Naging hugut man ro seguridad sa pagpanguna it Aklan Police Provincial Office ag iba pang law enforcement agencies.
Tuyo kara nga masiguro ro maayos ag matawhay nga 2025 National and Local Elections sa probinsiya.
Sa peace covenant signing, ginpirmahan kara it mga kandidato ro kasugtanan para sa sangka patas ag matawhay nga paghiwat it eleksyon.
Dugang pa ni Gerardo nga ro aktibidad hay nagapakita it paghiliusa it tanan nga sektor sa pagsueong it eowas ag malimpyo nga eleksyon sa Mayo 12.
