Kalibo Aklan ———-Kinahangean eon it Pilipinas nga makaangkon it universal vaccine cards nga magapamatuod nga kumpleto eon ro bakuna kontra sa COVID-19 ag pagakilaeahon maskin sa guwa it nasyon .
Raya ro ginpahayag ni Bombo International Correspondent Eula Vil Roberto, caregiver sa Hong Kong ag tumandok it Brgy. Old Buswang, Kalibo.
Suno kana nga nabudlayan makaron ro mga Overseas Filipino Workers bangud sa napabalitang owa ginakilaea it gobyerno it Hong Kong ro vaccine cards nga gina-isyu it mga Local Government Units.
Gindugang pa ni Roberto nga gusto it Hong Kong government nga ro vaccination cards hay kat ginakilaea it World Health Organization.
Ginklaru pa kara nga owa man naghambae ro gobyerno idtu nga peke ro mga bakuna nga ginagamit it Pilipinas.
Nauna eon nga ginduso it Pilipinas ro paggamit it yellow quarantine book ukon yellow card nga ginatau it Bureau of Quarantine nga pwedeng magamit sa pagguwa it nasyon .
Samtang, haeos 90 porsiyento eon sigon nga bakunado ro mga pumueuyu it hong kong kaibahan ro andang mga helper.
Apang ro mga may edad eon ag may comorbidity nga OFW hay owa ginapilit nga magpabakuna.
