KALIBO, AKLAN — Apisar nga nakabalik eon sa andang nasyun, uman nga nakipag-angot sa Sangguniang Panlalawigan it Aklan ro sangka 26-anyos nga foreigner nga gina sugid nga gin pamalibaran nga matuli ukon maipaidaeum sa circumcision sa provincial hospital ku Abril 26, 2017.
Suno kay Board Member Emmanuel Sodusta nga nagtawag kana ro owa gin hingaeanan nga complainant agud sayuron kun ano eon ro andang naging tikang hanungod sa anang gin paabot nga reklamo kontra sa pilang staff it nasambitang ospital nga gina sugid nga pinagpasa-pasahan imaw kat hambaeon nga gusto karang magpatuli kun siin gin turo sigon imaw trauma room it emergency area it ospital hasta sa dental clinic ag sa pinakaulihi hay gin balibaran ag gin hayag nga owa it doctor nga maga patigayun it operasyon.
Samtang, gin pamalibaran ni Dr. Paul Macahilas, chief of hospital it Dr. Rafael S. Tumbucon Memorial Hospital ro nasambitan nga isyu sa pagpamati it Committee on Health it SP.
Nasayuran nga ro estranghero hay nakapangasawa it Pinay ag raya sigon ro nagkumbinyu kana nga magpatuli.
