KALIBO, Aklan — Nagpanindugan si P/Maj. Jess Baylon, hepe it Malay Police Station nga gindepensahan eamang nana ro anang kaugalingon ag pamilya sa pagbaril sa igkampod it anang misis nga gina-alegar nga may diperensiya sa paminsaron sa Barangay Tinio-an, Cabatuan, Iloilo.
Suno kay Maj. Baylon nga matapos ro ginpatigayon nga selebrasyon sa kaadlawan it anang solomenteng unga hay nakaangkon it kinagamo sa tunga it biktima nga si Dennis Baylen, 27, ag ro tiyo kara nga si Lamberto Baylen, 59, bangud sa dating bagina.
Nagsueod sigon ro tiyo it anang misis sa andang baeay matapos nga eampusan it bote sa ueo ni Dennis agud nga magpangayo it bulig kay Maj. Baylon nga inga-an ukon sawayon ro biktima nga nagatuga it kinagamo sa guwa.
Ginasugid nga maskin nga ginsarado eon nanda ro andang gate, apang pwersahan raya nga ginbuksan it biktima ag nagpanghaboy it bato, nga kon sa siin hay aksidente nga natamaan ro misis ni Baylon ag nalipong.
Bangud kara, napilitan si Maj. Baylon nga barilon ro biktima sa anang siki agud nga mapakalma.
Ginpaathag pa it opisyal nga naka-mandatory leave imaw bangud sa kaadlawan it anang unga, kun sa siin hay nakaangkon it handaan.
Insigidang gindaea sa ospital ro anang misis, kaibahan ro anang tiyo nga si Lamberto ag ro igkampod nga si Dennis nga matapos nga mabueong hay dayun nga nakaguwa sa ospital.
Matapos ro insidente hay insigidang nagsurender si Maj. Baylon sa kapulisan.
Ginasugid nga plano it magtimbang nga pamilya nga magpasaka it kontra-demanda sa kada isaea bangud sa insidente.
