KALIBO, Aklan — Nakahilway ro sangka aktibong Amerikanong soldado nga naboe-an it baril samtang nagapasueod sa Caticlan Jetty Port matapos nga magpiyansa.
Madumduman nga si Tevin Vaughn , 25, residente it New Mexico, USA hay ginkasuhan it pag-eabag sa Republic Act 10591 ukon Comprehensive Firearms and Ammunition Regulation Act ag ginpaidaeum sa inquest proceedings sa piskalya kahapon nga adlaw.
Ro nasambit nga US army hay naboe-an it 9mm nga baril nga kargado it waeo nga bala nga nakasueod sa anang backpack kat mag-agi sa x-ray machine sa nasambit nga pantalan.
Aminado si Vaughn nga ro anang daea nga baril hay owa it nagakaigo nga dokumento .
Nakahilway imaw matapos nga magpiyansa it P120,000.
Samtang, ginpahayag ni P/Major Jess Baylon, hepe it Malay Police Station nga maskin imaw hay nangawa kon ham-an nga naka-eusot ro anang baril sa airport sa pagsueod nana sa nasyon halin sa Amerika kamana man sa pagsakay nana sa RORO vessel paagto sa Caticlan.
Nasayuran nga ro Amerikano hay nag-agto sa Pilipinas agud nga makipag-eyeball sa anang nakilaea nga pinay sa social media.
Nagkita sigon sanda sa Manila antes nga nagderetso sa Batangas, paagto sa Boracay agud nga magbakasyon , apang nabulilyaso bangud sa nabo-oe nga armas kana.
