KALIBO, Aklan–Apisar nga napas-eawan ro koponan it Amerika kontra sa Netherlands sa nagapadayun nga FIFA World Cup 2022, nagapabilin gihapon nga masadya ro mga pumueoyo.
Ginpahayag ni Bombo International Correspondent Greg Aguilar it California, USA nga mabahoe eon ro pagpasaeamat it nasyon nga nakasueod ro andang national football team sa round of 16.
Raya hay bangud nga sambilog ro team USA sa pinakabata nga koponan nga nagpasakop sa World Cup.
Angot kara, sigurado sigon nga pagapreparahan it Amerika ro nakataeana nga paghost nanda it torneo sa masunod nga ap-at nga dag-on.
Ginakabig man kara nga sangka manami nga eksperyensya ro natabo makaron nga world cup para sa andang koponan ag kumpiyansa sanda nga makabulig raya sa pag-angat it andnag ranking.
