Nagapahaom eon sigon ro military it Estados Unidos para sa posibilidad it tayuyon ag pilang dominggong operasyon kontra sa Iran kon magmando si U.S. President Donald Trump nga salakayon ro nasyon.
Suno sa mga opisyal nga nagpamalibad nga magpasambit pangaean bangud sa sensitibong isyu, mas maeapad ag mas seryoso sigon ro plano it operasyon kumpara sa mga naunang military retaliation it US.
Nasayuran nga nakataeanang makipagpueong ro representante it Amerika nga sanday Steve Witkoff ag Jared Kushner sa mga representante it Iran sa Geneva sa Martes, kon sa siin magaserbing tagapatunga ro Oman para talakayon ro kasugtanang pangkalinungan.
Nauna eon nga ginpahayag ni US Secretary of State Marco Rubio nga mas gusto ni Trump ro sangka kasugtanan sa Tehran apang aminadong malisod raya nga maangkon.
Samtang, padayon ro pag-abo it puwersang military it US sa rehiyon.
Ginkumpirma it mga opisyal nga magapadaea ro Pentagon it dugang nga aircraft carrier sa Middle East, kaibahan ro libu-libong tropa, fighter aircraft, ag guided-missile destroyers.
