Nagbaeos ro Estados Unidos it mga airstrike kontra sa Iran matapos akusahan ni U.S. President Donald Trump ro nasyon sa pag-atake sa sangka US helicopter sa Strait of Hormuz, nga nagresulta sa insigidang military response.
Suno sa U.S. military, nag-umpisa ro operasyon bandang 5:00 p.m. Eastern Standard Time, bilang sabat sa pagbagbag it Apache helicopter.
Ginpamnilit it Amerika, “proportional response” ro ginpatigayon nga strike kontra sa ginatawag nanda nga “unjustified Iranian aggression.”
Nasayuran nga naeowas ro daywang piloto it helicopter pinaagi sa sangka unmanned sea drone ag ko ulihi hay ginsaylo sa eowas nga lokasyon.
Ginpahayag man ni Trump nga eowas ag owa it naangkon nga nina ro daywang crew, apang gin-insister nana nga kinahangean it Estados Unidos nga magsabat sa natabu nga insidente.
Samtang, nagapabilin nga bukon it klaru kun ginhungod baea ro pag-atake sa helicopter, suno sa pilang opisyal it U.S.
Owa man direktang gin-aku it Iran ro responsibilidad, maskin nga ginkumpirma it pilang Iranian media nga may natabu man nga pagbagbag it eroplano.
Kadungan kara, uman nga nag-init ro tensyon sa rehiyon matapos ro separadong mga airstrike it Israel sa southern Lebanon, nga nagresulta it paeag it posibleng panibag-ong pagbaeos halin sa Iran.
Ginpaandaman man ni Iranian Foreign Minister Abbas Araghchi ro mga militar it Amerika sa rehiyon nga naka deploy nga mabahoe ro tyansa it peligro bangud sa posibleng aksidente ukon gulpiyadang bakbakan.
Sa tunga it naga-grabeng tensyon, ginpahayag ni Trump nga nagaeaum imaw sa sangka posibleng kasugtanan para sa ceasefire sa rehiyon, apang nagapabilin nga owa pa it direktang mga kasugtanan nga magapapundo sa tensyon sa Strait of Hormuz.
