KALIBO, Aklan—Nagapangatubang sa kasong qualified theft ro sangka bading matapos nga takawan ro anang amo nga US pensioner sa Barangay Poblacion, Lezo, Aklan.
Naaresto sa ginpatigayon nga follow-up operation it mga kapulisan ro suspek nga nakilaea kay Ryan Iledan Taglay, 28-anyos ag residente it Barangay Agcawilan, Lezo, Aklan.
Base sa report it Lezo Police Station, nagreklamo kanda ro biktimang si Necita Yerro-Rembulat, 79-anyos, sangka pensyunada ag residente it Barangay Poblacion nga natukiban eon lang nana nga owa eon ro anang kwarta sa drawer sa sueod it anang kwarto.
Suno sa biktima nga nagduda imaw nga si Ryan ro nagbo-oe sa anang kwarta matapos makabaton it impormasyon nga nakita raya nga maabu ro kwarta ag nakabakae pa it bag-ong motorsiklo.
Nakabaton it tip ro mga otoridad nga nagrenta imaw it taxi halin sa Roxas City agud nga sueangon ro sangka amigo nga eaeaki sa banwa it Kalibo rason nga ginkasa ro operasyon ag na-korner raya sa Barangay Cortes, Balete, Aklan.
Narekober sa suspek ro kapin sa 10,925 US dollars ag masobra sa P146,000 nga cash.
Nabawi man kana ro anang bag-ong bakae nga motorsiklo nga ginkustodiya sa Lezo Police Station.
Ro suspek hay nagatrabaho bilang part time sa baeay it biktima ag ulihi raya nga nakita sa lugar ko Enero 20, 2019.
