Inaprubahan eon ni US President Joe Biden ro emergency declarations sa estado it Florida nga epektibo halin ko Oktubre 5 bangod sa Hurricane Milton.
Ginmando eon man ni Biden ro pagtao it federal assistance para sa augmentation sa response efforts it estado.
Gin-otorisa man it Pangueo ro Federal Emergency Management Agency nga makipagbuligan sa tanan it disaster relief efforts ag magtao it bulig para sa kinahangean nga emergency measures agod nga maieowas ro mga kabuhi ag protektahan ro mga manggad, kaeawasan ag kaeowasan it publiko.
Sakop it mismong emergency declaration ro 75% federal funding para nagkaeain-eain counties it Florida.
Kinumpirma man ni White House Press Sec. Karine Jean-Pierre ro mismong deklarasyon ag siniguro nga ginahimo it Biden administration ro tanan agod nga mabuligan ro mga maapektuhan it hurricane Milton.
Samtang, nag-umpisa eon man nga igamando ro evacuation o paghalin halin sa Gulf coast it kapin sa linibong mga residente kadungan it pagbaskog pa it hurricane sa Category 5 storm nga may sustained winds nga 175 mph.
Suno kay Florida Gov. Ronald DeSantis, posibleng tumama o mag-landfall ro hurricane sa Florida peninsula sa Tampa Bay area o Southwest Florida gabie it Miyerkules o agahon it Huwebes.
