International News———Magatao it direct budgetary aid sa Ukraine ro Estados Unidos nga nagakahaeaga it USD500 million.
Ginpahayag raya it White House matapos ro naging pag-istorya nanday US President Joe Biden ag Ukrainian President Volodymyr Zelensky via phone call agud nga istoryahan ro padayun nga pagsuporta it Amerika sa Ukraine kontra sa Russia.
Suno sa White House, ro nasambitang bulig pinansyal hay nagatuyong mabuligan ro Ukraine nga mabayaran ro mga pasuweldo sa mga tawo idto ag iba pa.
Samtang, gin-istoryahan man it daywang leader kung paalin nga ginahimo it Estados Unidos ro tanan nga masarangan agud nga matuman ro mga nagapangunang hinyo nga security assistance it Ukraine, ag padayun nga paghimakas it Amerika kaibahan ro iba pang mga kaalyado kara sa pagtumod sa mga dugang nga bulig para sa Ukrainian military agud nga maipakigsukoe ro andang nasyon kontra sa Russia.
