KALIBO, Aklan—Naging maayos ro pakikipagkita ni US President Joe Biden kay Florida Governor Ron DeSantis agud nga tan-awon ro kahalitan nga gintuga it Hurricane Ian sa nasambit nga estado.
Raya hay sa pihak it maugong nga espekulasyon nga ro gobernador it Florida ro magiging kaengkwentru kara sa 2024 Republican presidential election sa US.
Suno kay Bombo International Correspondent Greg Aguilar it California, USA nga gin-istoryahan it daywang lider ro kinahang-eanon nga bulig para sa pagbangon it Florida.
Ginpahayag ni Aguilar nga sanday Biden nga sangka Democrat ag DeSantis nga sangka Republican hay nauna eon nga nakaangkon it mainitan nga diskusyon bangud sa magkaibang panindugan sa nagkaeain-eain nga isyu partikular sa bakuna sa COVID-19, abortion ag kinamatarung it LGBT.
Apang ginpaiway anay raya it daywa sa andang pagbisita sa grabeng tinamaan it bagyo nga Fort Myers kadungan it ginpromisa nga federal support ni Biden para sa paglimpyo ag rebuilding effort nga magakinahang-ean it mabahoe nga kantidad ag posibleng magabuhay it pilang dinag-on antes nga matapos.
Madumduman nga masobra sa 100 nga katawo ro nagkaeamatay ag haeos 400,000 nga baeay ag negosyo ro owa it supply it kuryente sa Florida limang adlaw matapos ro pagpanaeasa it Hurricane Ian sa bilog nga estado.
