Record high eoman ro sovereign debt it nasyong Pilipinas as of July 30, 2024 samtang nagapadayon man ro pag-utang it gobyerno it Pilipinas agod nga punduhan ro budget kara para sa mga programa ag proyekto.
Raya hay base sa ginpaguwa nga bag-ong datos it Bureau of the Treasury. Suno sa ahensya , lumubo eon raya sa P15.689 trillion nga katumbas it 1.3% nga pagtaas halin sa P15.483 trillion nga outstanding debt nga nailista ko katapusan it Hunyo sa parehong dag-on.
Paathag pa kara nga ro P206.49-bilyon nga month-on-month nga pagtaas it utang sa nasyon hay bangod eon man sa net issuance sa sueod ag guwa nga utang.
Suno sa ekonomistang si Michael Ricafort, ro padayon nga pagtaas it inflation hay sangka kabangdanan kung haman nagataas ro paggastos it gobyerno.
Sa pihak kara, mataas man ro interes rate samtang sangkire nga humina ro bayluhan it piso halin ko 2022 nga nangin kabangdanan man para tumaas ro balor it pabayad sa utang.
Una eon nga ginhambae ni Finance Secretary Ralph Recto nga mahimo pa nga lumubo ro utang it Pilipinas sa P20 trillion sa pagtapos it termino ni PBBM sa 2028.
Nagapati ro opisyal nga ro pag growth sa ekonomiya it nasyon hay mas magasubra pa sa kabilugang balor it utang it gobyerno.
