KALIBO, Aklan—Ginpaathag it sangka abogado nga posibleng may pag-eabag sa constitution ro pag-angkon it interest sa Statement of Assets, Liabilities, and Net Worth (SALN) ni Vice President Sara Duterte bangud sa pagpasilabot sa transaction it gobyerno ag pribado apang uwa it direktang makatumod kon may saea ro bise presidente sa anang pagdisclose sa GenCorp Industries Inc. matapos nga ginkumpirma ni Davao City Mayor Sebastian “Baste” Duterte nga uwa imaw it kasayuran sa involvement it anang magueang sa nasambit nga transaction.
Raya hay matapos nga ginpatawag sa senate impeachment court ro local chief executive agud sabton ro mga kutana angot sa mga kontratang ginsueod it Davao City government sa GenCorp Industries Inc.
Dugang pa ni Rev. Fr. Atty. Jude Rebaldo it St. Isidore The Farmer Nabas Parish nga posibleng dudahan nga may kahilabtanan ro alkalde sa kumpanya nga nakabuoe it maabong kontrata sa lokal nga gobyerno apang inde raya direktang makaturo kon may anomalous transaction gidman si VP Sara sa GenCorp.
Nasayuran nga gindeklara it Senate impeachment court bilang “hostile witness” si Mayor Duterte sa pagbista sa impeachment case kontra sa anang magueang nga si VP Sara.
Napamatud-an sigon nga may adverse interest ro alkalde sa bahin it prosekusyon rason nga ginpasugtan raya nga kutan-on gamit ro mga leading questions.
