Nagpaandam ro Land Transportation Franchising and Regulatory Board ukon LTFRB Region 6 sa mga driver ag operator it public utility vehicles ukon PUV nga inde pwede magpanukot it bag-ong pamasahe umpisa ko Setyembre 28 kon uwa sanda it updated fare matrix nga ginpaguwa it ahensya.
Suno sa LTFRB region 6, dapat mabuoe anay it mga operator ro bag-ong fare matrix ag maipaskil raya sa sueod it andang mga saeakyan bago ipatuman ro dugang nga pamasahe.
Sa bag-ong pamasahe, magataas it ₱1 ro minimum fare it traditional jeepney halin ₱13 paadto sa ₱14 sa unang ap-at nga kilometro, samtang ro succeeding kilometer hay magiging ₱2 halin sa ₱1.80.
Para sa modern jeepney, magiging ₱17 ro minimum fare halin sa ₱15, samtang magataas sa ₱2.40 ro kada masunod nga kilometro halin sa ₱2.20.
May dugang pamasahe man para sa TNVS, UV Express, taxi, airport taxi ag point-to-point buses.
Magapabilin mat-a ro mandatoryong 20-percent discount para sa mga estudyante, senior citizen ag persons with disabilities.
Gin-aprubahan ni Transportation Secretary Giovanni Lopez ro fare adjustment nga nauna eon nga ginsuspinde ko Marso 2026 bangud sa padayon nga pagtaas it presyo it langis.
Samtang, ginsug-aeaw it pilang transport groups sa Western Visayas ro dugang pamasahe bangud sa makabulig sigon raya sa andang gastuson sa operasyon.
Apang, ginpasiguro it mga kooperatiba nga magabuoe anay sanda it updated fare matrix bago magpanukot it bag-ong rate.
