Ginakabaeak-an makaron it barangay council it Manocmanoc, Boracay ro uwa it katapusan nga problema sa basura.
Raya hay kasunod sa pagkansela it klase it mga eskwelahan maeapit sa centralize Material Recovery Facility (MRF) bangud nga inde eon matakdan ro mabaho nga hugom kon sa siin nagaresulta sa pagsuka it pilang estudyante.
Suno kay punong barangay Nixon Sualog, uwa it naging aksyon ro ECOS Sanitary Landfill and Waste Management Corporation kasunod sa pilang rason nga samad ro andang behikulo nga nagahakot it basura patabok sa mainland Malay.
Bangud kara, ginapausisa nana sa sangguniang bayan ro kontrata it ECOS sa tunga it lokal nga gobyerno it Malay bangud nga uwa man nagapaltos kanda it pagbayad
Masyado eon suno kana nga naperwisyo ro anang mga constituents ag nagakabaeaka sa andang ikaayong eawas.
Ginpahayag dugang ni kapitan Sualog nga mismong ro ECOS ro may problema bangud nga uwa nanda ginaayusa ro andang trabaho rason nga kinahang-ean eon nga makansela ro andang kontrata.
Inde eon sigon nanda masarangan kon uman nga maipasarado ro Boracay bangud sa problema sa basura bangud nga siguradong makaabot raya sa national government
