KALIBO, Aklan—Kabilugan nga naging malinong ro nagtaliwan nga May 9 national and local election sa bilog nga probinsya it Aklan.
Raya hay sandig man sa assessment it Highway Patrol Group ukon HPG-Aklan bilang sambilog sa mga law enforcement agency nga gindeploy sa tyempo it botohan.
Suno kay Police Staff Sargent Hetler Villanueva it HPG Aklan, uwa sanda it nadakpan nga mga violator sa ginpatigayon nga checkpoint sa adang area of responsibility.
Uwa man it illegal nga aktibidad nga nadakpan ag uwa man it kontrabandong naaprehend.
Makabig suno kana nga matawhay ro tyempo it eleksyon sa Aklan base man sa andang pagmonitor halin sa oras it andang deployment.
Samtang sa pihak nga parte, nagapadayon ro daily routine it andang taeatapan partikular ro pagpatigayon it information dissemination sa mga motorista, drivers and operators it nagkaeain-eain nga klase it saeakyan.
