KALIBO, Aklan—Nagapadayun ro bakunahan kontra COVID-19 sa banwa it Banga.
Suno kay Ms. Donnalyn Siyambio, tagapaghambae it municipal inter-agency task force it LGU-Banga nga kada may naga abot nga alokasyon it bakuna halin sa provincial government hay insigida nanda raya nga gina divide sa 30 nga ka barangay it Banga, apang ginapasiguro nga mataw-an it prayoridad ro nakalista it mataas nga kaso it deadly virus.
Kadungan kara, gin engganyo nana ro tanan nga magpabakuna eon ag indi magpili it bakuna nga igaturok.
Nagapahaum man sigon ro kada barangay it quick substitution list sa mga nagpalista nga napas-eawan nga maka-abot sa andang schedule.
Ro mga interesado suno kana hay pwedeng magpalista sa andang mga midwife ukon BHERts.
Ginpasiguro man nana nga indi igapatuman ro palakasan system sa bakunahan.
Gindugang pa ni siyambio nga sa makaron hay ginatinguhaan nanda nga mabakunahan ro una sa A4 priority groups ukon essential workers.
Para man sa mga OFW nga magapabakuna, ipakita eamang sigon ro andang kontrata ag manugpanaw sa sueod it ap-at nga buean.
Sa mga nagapabakuna, ginpadumdum nana nga daehon ro ID ag pirmeng magsunod sa health protocols pag-abot sa lugar it bakunahan.
