KALIBO, Aklan—Dere-deretso ro pag-abot ag pag-roll-out it mga bakuna kontra covid 19 sa probinsiya it Aklan.
Raya ro ginpahayag ni Jay Lorenz Dionesio, Nurse 11 ag vaccination area manager it provincial government.
Sa A1 priority group ukon mga healthcare worker, 13,720 ro naibakuna sa first dose ukon 99% ag 79% ukon kapin sa 11,000 man sa second dose ukon fully vaccinated.
Sa A2 priority group ukon mga senior citizen, masobra sa 30,500 ro naibakuna first dose ukon 50% samtang 33% ukon kapin sa 20,200 sa second dose.
Sa A3 priority group ukon mga persons with comorbidities, 66% ukon masobra sa 23,600 ro naibakuna sa first dose samtang 36% ukon masobra sa 12,816 sa second dose.
Sa A4 priority group o mga economic frontliner, nag abot eon sa 47% ro naibakuna sa first dose ag 5% sa second dose bangud nga nagapadayon raya makaron.
Ginapahauman eon man sigon nanda ro pang –ulihi sa A5 priority group ukon indigent population.
Kaabuan suno kana sa mga nag-abot nga bakuna makaron hay sinovac kamana man ro moderna ag astrazeneca.
Kadungan kara, uman nga gin engganyo ni Dionesio ro tanan nga kon mag abot eon ro andang tiempo hay magpabakuna agud nga makaangkon it proteksyon kontra sa deadly virus eabi pa ag kalhit eon sa nasyon ro delta variant it covid 19.
