KALIBO, Aklan—Nagapadayun makaron sa isla it Boracay ro pagbakuna sa mga senior citizens kontra sa COVID-19, gamit ro bakunang Aztrazeneca.
Suno kay Malay OIC mayor Frolibar Bautista nga 500 ro andang target nga mabakunahan nga mga naka-rehistrong senior citizens ag iba pang mga nabilin nga mga frontline service workers.
Kahapon hay natigayon nga mabakunahan ro 183 nga indibidwal ag makaron hay pagatutukan ro masobra sa 300 nga iba pang nabilin sa listahan.
Gindugang pa ni mayor Bautista nga owa sanda nagabaton it walk-ins sa andang vaccination sites agud nga malikawan ro kinagamo.
Samtang, ginahueat pa sigon nanda ro go signal maghalin sa provincial government ag Department of Tourism agud nga mataw-an man it bakuna ro mga tourism workers sa isla.
Ginklaru pa ni mayor Bautista nga padayun ro andang pagbaton it mga turista halin sa Western Visayas partikular ro mga taga-Iloilo sa pihak nga ginpaidaeum sanda sa modified enhanced community quarantine ukon MECQ basta nga makompleto nanda ro mga ginapangayo nga requirements.
Nagapabilin suno kana nga bawae ro mga turista nga taga-NCR plus areas.
