KALIBO, Aklan—Maskin nga may mga nagaduda ro pila, apang mataas ro kumpiyansa it mga taga-United Kingdom sa bakuna para sa Coronavirus Disease 2019 (COVID-19) kadungan it pag-umpisa it andang mass vaccination sa martes nga adlaw.
Suno kay Bombo International Correspondent Merds Vidal it West London, England ag tubong Barangay Bulwang, Numancia, Aklan, mabahoe nga porsiyento it mga pumueuyu idtu hay may pagsalig sa pagiging eowas ag epektibo it Pfizer/BioNTech Covid-19 vaccine.
Nagatau sigon raya it pag-eaum sa kaabuan nga makabalik eon sa normal ro andang pagpangabuhi.
Dugang pa kara nga maskin nga may bakuna eon hay doble-dahan gihapon ro mga tawo ag pirmeng nagasunod sa mga health protocols.
Unang makabaton sigon it bakuna ro mga pasyenteng may edad 70 pataas nga may pahanugot halin sa andang natungdan nga pamilya, mga care home workers ag nagatrabaho sa National Health Service (NHS).
Ro UK ro kauna-unahang nasyon sa bilog nga kalibutan nga magapatigayon it mass vaccination agud nga suk-ean ro COVID-19.
