KALIBO, Aklan—Ginkumpirma it Land Transportation Franchising and Regulatory Board ukon LTFRB Region 6 nga nagpaguwa eon sanda kahapon it show cause order kontra sa management it Vallacar Transit Incorporated angot sa nag-euntad nga aksidente sa daeanon sa sambilog sa andang unit sa Brgy. Igbucagay, Hamtic, Antique, hapon it Martes, Disyembre 5, 2023.
Sa interview it Bombo Radyo Kalibo kay Atty. Jun Altura, tagapaghambae it LTFRB-Region 6 nga nakataeana ro pagpamati kara sa Disyembre 13, Miyerkules nga adlaw.
Gintaw-an sigon nanda it 72 oras ro kompaniya agud nga magpaathag kon ham-an nga indi sanda dapat nga papanaugan it penalidad sa natabu nga makangieidlis nga aksidente.
Pag-suspinde it prangkisa ukon kanselasyon it biyahe sa bilog nga Panay ro posibleng paga-atubangon nga penalidad it nasambit nga kompanya.
Sa makaron hay nagsaka eon sa 18 ro patay matapos nga binawian it hueam nga kinabuhi samtang ginabueong sa ospital ro sambilog pa sa pasahero kara.
Nauna eon nga nagpaguwa it 90-day preventive suspension ro LTFRB kontra sa Vallacar Transit Incorporated Miyerkules nga adlaw, Disyembre 6.
Raya hay nagakahueugan suno kana nga ro bilog nga fleet ukon ro nabilin nga 12 nga mga units it bus nga nagabiyahe sa nasambit nga ruta ro ginsuspinde.
Gindesisyunan sigon nanda nga imbes nga 30 diyas hay gin-extend it hasta 90 diyas ukon tatlong buean ro suspension kahapon it hapon.
Suno kay Atty. Altura nga ro suspension hay magatau it daean agud nga maimbestigahan ro insidente.
Dapat suno kana nga siguraduhon it mga operator it bus nga una sa maayos nga kundisyon ro andang mga saeakyan antes nga magbiyahe sa karsada ag usisaon man ro kahimtangan ukon kamaeayran it andang mga driver para sa kaeowasan it mga pasahero eabi eon makaron nga maabu ro nagabakasyon bangud sa holiday season.
Nasayuran nga daya eon ro ikaywa nga beses nga may nahueog nga Ceres bus sa nasambit nga lugar kun sa siin ro una hay ko 2019.