KALIBO, Aklan—Padayun ro pagtau it financial assistance it Vallacar Transit, Incorporated , operator it mga Ceres bus sa tanan nga mga biktima it makangieidlis nga aksidente nga ginakaeakutan it sambilog nanda nga bus.
Suno kay Jade Marquez, public relation manager it nasambit nga kompanya nga nagbutang sanda it help desk sa magkaseparado nga mga ospital nga gindaehan sa mga biktima agud nga insigidang masabat ro andang mga kinahangeanon.
Mag-eowas kara, nagbutang man sanda it help desk sa Hamtic Municipal Police Station ag sa mga funeral homes.
Sabat sigon nanda ro tanan nga mga gastos para sa mga naninahan ag pagpa-eubong sa mga namatay kamana man ro pag-transport sa andang mga bangkay pauli sa andang mga baeay.
Sa natabu nga aksidente sa Brgy. Igbucagay, Hamtic, Antique, hapon it Martes, Disyembre 5, 2023, kabilugan nga 29 ro nadaeasa sa disgrasya nga ginaeakipan it 28 nga sakay it bus ag sangka 17 anyos nga pedestrian nga nahapit ro anang waea nga alima.
Ro bus hay halin sa Iloilo ag paagto kunta sa Culasi kat mahueog sa banglid sa ginakabig nga accident prone area.
Nagaeaum sanda nga indi eon madugangan ro 18 nga numero it namatay.
Sa makaron hay 11 pa nga pasyente ro ginabueong sa magkaseparadong hospital kun sa siin tatlo sa Western Visayas medical center, ap-at sa angel salazar memorial general hospital sa San Jose, daywa sa mission hospital sa Iloilo ag daywa sa St. Paul Hospital.
Na-discharge eon suno kana sa ospital ro pedestrian nga grade 12 student.
Ginpasiguro man it kompaniya nga gina asikaso eon nanda ro mga kinahangean nga dokumento sa pag-transport sa bangkay it namatay nga Kenyan national nga missionary ag sangka bilog nga pamilya nga taga south cotabato nga ginaeakipan it ap-at nga indibidwal.
Sa pihak nga parte, gindugang pa ni marquez nga owa it chansa nga marekober ro mga data halin sa dash cam it bus bangud sa pagka-guba kara nga makabulig kunta sa andang pagahimuon nga internal investigation.
