KALIBO, Aklan—Sangka aksidente ro nag eontad sa bahin it Brgy. Naisud, Ibajay matapos nga bumunggo ro sangka tricyle sa sangka van pasado 8:30 kahapon it agahon.
Nakilaea ro driver it tricyle kay Rudy Nambong, 55-anyos ag ro mga onga kara nga angkas nga sanday Leunnelyn Magluyan 19-anyos, Jennifer Magluyan 21-anyos ag sangka daywang dag-on nga onga nga puro taga San Jose, Ibajay.
Sandig sa imbestigasyon it Ibajay PNP, maghalin sa deriksyon it San Jose, Ibajay ag paagto it Tangalan ro bilog nga pamilya kat aksidente nga mabungguan nanda partikular sa may pakurbada nga daean ro sangka pampasahero nga van nga ginamanehar ni Fred Sabino, 54-anyos ag residente it San Miguel, Iloilo.
Madasig sigon ro pagpadaeagan ni Nambong sa tricycle kara rason nga nagpang-agaw eon raya it linya.
Nakaangkon it pilang ka mga lastro sa andang mga eawas ro mga biktima ag insigida nga gindaea sa ospital para sa nagakaigo nga pagbueong.
Sa pihak nga parte,gindaea man sa ospital ro leave-in partner ni Nambong kaibahan ro sangka 11-anyos ag 7-anyos nga onga apang gilayon man nga nakaguwa eagi matapos nga owa man naka-angkon it grabe nga lastro sa andang eawas.
Sa makaron pareho nga impound sa Ibajay PNP ro daywang ka mga saeakyan ag nakadepende pa sa maging istorya it daywang kampo.
