VCM it Smartmatic inde eon paggamiton it Comelec

Inde eon paggamiton it Commission on Elections (Comelec) ro mga vote counting machines (VCMs) it Smartmatic sa mga masunod nga eleksyon matapos ro waea-tuo nga report it pagkaaberya kara sa nagkaeain-eain nga polling precincts sa nasyon.

Ginpahayag ni Comelec Commissioner Marlon Casquejo nga dayang national and local elections eon ro ulihing beses it paggamit nanda sa nasambitang makina.

Mga luma eon man sigon ro nasambitang mga VCM nga unang ginamit kato pang 2010 elections.

Ginpahayag ni Casquejo nga pagahinyuon nanda sa Kongreso nga mataw-an ro poll body it dugang nga pondo para sa pagbakae it mga bag-ong makina para sa masunod nga eleksiyon sa nasyon.