Kalibo Aklan ——Nagnaba sigon it 60 hasta 90% ro coronavirus count it pilang pasyente matapos gamitan it virgin coconut oil (VCO), suno sa Philippine Council for Health Research and Development (PCHRD).
Halin ko buean it Mayo hay nagapatigayon eon it clinical trials ro Department of Science and Technology (DOST) sa virgin coconut oil bilang agent it suspected ag probable COVID-19 cases sa Laguna.
Mag-eowas sa nasambitang resulta, nadiskubre man sigon it mga researcher ro manami nga epekto it VCO compound sa cell survival.
Apang, kinahang-ean pa it padayon nga pagtuon kon mas epektibo kontra sa pagkalhit it virus ro mas maabong concectration it VCO.
Ro DOST-PCHRD ro nagtaeana it pondo sa pag-istudyo nga ginpangunahan ni Dr. Fabian Dayrit it Ateneo De Manila University.
Mag-eowas sa trial site sa Laguna, nakataeana man nga mag-umpisa ro separadong clinical trials it VCO sa COVID-19 patients sa Philippine General Hospital.
Target it Science department nga makadiskubre it iba pang alternatibong solusyon samtang ginahueat it bilog nga kalibutan ro bakuna kontra sa COVID-19.
Ro Food and Nutrition Research Institute, kaibahan ro University of the Philippines-Manila hay may separado man nga pagtuon sa ikasarang it VCO para mapabaskog ro immune system it tawo.
