Sangka gachapon ukon vending machine sa Kagurazaka, Tokyo ro ginadayo bangud nga nagabaligya raya it mga ID picture it mga estranghero sa balor nga 300 yen!
Mainit nga gina-istoryahan makaron it mga Japanese netizens ro kakaibang gachapon ukon vending machine bangud nga nagabaligya raya it mga litrato it tawo.
Masyadong naging curious ro mga Japanese sa vending machine bangud bukon it litrato it mga artista, singer ukon celebrity ro ginabaligya kara kundi mga estranghero ukon ordinaryong tawo.
Ginbutang ro vending machine sa Kagurazaka ko Marso 2022.
Umpisa nga may nag-post sa Twitter angot sa unique nga vending machine, ginpilahan eon raya ag ginadayo it mga nagabakae halin sa mga maeayo nga lugar kapareho it Osaka.
Ro iba hay ginasigurado nanda nga makolekta ro tanan nga 10 litrato halin sa vending machine.
Nasayuran nga ro nagapanag-iya it vending machine hay si Terai Hiroki.
Suno kana nga ro anang ideya hay nagtuhaw bangud sa pandemic.
Ginpahayag dugang nga nakasuksok it face mask ro tanan nga tawo sa palibot rason nga naisipan nana nga manami nga makita ro kabilugan nga itsura it sangka estranghero sa makaron nga tiempo.
Ginapasiguro man nana nga ro tanan nga mga litratong mabakae sa vending machine hay may pahanugot it mga nagapanag-iya kara.
Sa sobrang dahog it vending machine, makaangkon it second batch ro mga litrato kun sa siin ro mga bag-ong itsura it estranghero ro pwedeng kolektahon.
