KALIBO, Aklan — Hugut nga ginakundina it Bagong Alyansang makabayan (Bayan)-Aklan ro ginsudlan nga verbal agreement ni Pangueong Rodrigo Duterte sa China may kaangtanan sa pagpangisda sa West Philippine Sea.
Suno kay Kim Sin Tugna it Bayan-Aklan nga dapat nga gin-konsulta anay sa mga pumueuyu ro nasambit nga tikang antes nga nakipagkasugot sa China bangud nga nakataya kara ro soberenya ag patrimonya it nasyon.
Nagatuhaw suno kana nga matsa gintugyan eon ni Pangueong Duterte sa China ro gina-agawang teritoryo nga sakop it exclusive economic zone it Pilipinas.
Gin-engganyo man nana ro presenteng administrasyon nga atubangon ro China ag protektahan ro mga ginaboe-an it manggad it Pilipinas.
Ro isyu suno kana sa natabu nga banggaan sa Recto Bank hay owa eamang nakasentro sa teritoryo it nasyon kundi pati man sa seguridad it makaon it kada Pilipino.
Ginpamilit pa ni Tugna nga ro Recto Bank sa WPS hay mabahoe nga ginaboe-an it aqua-marine resources.
Ginapanag-iyahan sigon it nasyon ro WPS at bukon it ana it China.
Ginpuna man nana ro pagiging mata-eaw ni Duterte bangud sa kahadlok nga giyerahon it China maskin nga manggad it nasyon ro nakataya.
Ginbatikos man it Bayan-Aklan ro pahayag it presidente nga sangka maisot nga maritime accident ro pagbangga it Chinese crew sa baroto nga pangisda nga kon sa siin sakay kara ro 22 nga mangingisdang Pilipino sa Recto Bank.
