KALIBO, Aklan — Mas pang ginhugtan ro monitoring it mga Veterinary Quarantine personnel sa Aklan sa mga cargo ag bagahe nga nagasueod sa Kalibo International Airport ag Caticlan Jetty Port matapos nga kumpirmahon it Department of Agriculture nga 14 sa 20 sample it dugo it baboy nga gin-usisa hay positibo sa African Swine Fever ukon ASF.
Sa pahayag ni Dr. Christine Lynn Melgarejo, Veterinarian-Quarantine officer it Bureau of Animal Industry antes pa man ro kumpirmasyon sa pagsueod it ASF sa nasyon hay nakipag-angot eon sanda sa concerned agencies nga i-monitor ro shipments nga nagahalin sa Luzon ag mga nasyon nga apektado it makataeapon nga ASF.
Suno pa kana nga ginsunog ag gin-eubong nanda ro 210 kilograms it imported processed meat products nga nakumpiska sa Kalibo airport nga bitbit it mga turista nga naghalin sa China ag Korea.
Ginakumpiska man sigon ukon ginabalik sa anang origin ro mga buhi nga sapat nga owa it nagakaigo nga dokumento.
Samtang, suno kay Dr. Melgarejo, owa it dapat nga ikahadlok ro publiko eabi eon kon ro baboy hay gin-eaha it mayad bangud nga ro sakit hay nagatapon eamang sa mga kasapatan.
