KALIBO, Aklan–Ginpaaresto it korte sa Taguig ro actor nga si Vhong Navarro bangud sa kasong rape.
Ko Lunes it gabi-i hay ginpaguwa it Taguig City Regional Trial Court Branch 69 ro warrant of arrest it actor sa kasong rape.Ro nasambit nga warrant of arrest hay pirmado ni Judge Loralie C. Datahan kung siin ginmandu kara ro pag-aresto sa actor sa kasong “rape” ag owa it gintaeana nga ano man nga piyansa sa idaeom it Article 266-A.
May kaangtanan ro kaso nga gindihon ni Deniece Cornejo ko dag-on 2014.
Ginpahayag ni Atty. Axel Gonzalez, sambilog sa mga nagbuyot it kaso ni Deniece nga siguradong kulong eon ro actor kamana man nga owa it gin-rekomenda nga piyansa para sa kasong rape.
Nasayuran nga ko 2014 hay ginbasura it Department of Justice ro tanan nga kaso nga ginpasaka kontra kay Navarro kaibahan ro rape case.
Samtang, nag-atubang man ko Lunes it agahon sa National Bureau of Investigation (NBI) si Navarro bangud sa kasong acts of lasciviousness nga ginpaguwa ni Judge Angela Din it Metropolitan Trial Court Branch 116 it Taguig City.
Kung siin nagpiyansa imaw it kapin sa P36.000 para sa temporaryong kahilwayan.
Madumduman nga ko Hulyo 31 hay nagmandu it Court of Appeals (CA) sa Prosecutors Office it Taguig nga kasuhan it rape ag acts of lasciviousness ro actor.
