Ginpangunahan ni Vice President ag Education Secretary Sara Duterte-Carpio ro pagpanupod it ayuda para sa libo-libong residente nga naapektuhan it oil spill sa Caluya, Antique.
Suno kay Provincial Disaster Risk Reduction Management Office (PDRRMO) head Broderick Gayuna-Train, personal nga nagbisita sa probinsya ro bise presidente agud nga makit-an ro sitwasyon it mga pumueoyo kon sa siin personal nana nga ginpasaalima ro Relief for Individuals in Crisis and Emergencies (RICE) food boxes sa 1,200 nga apektadong residente sa mga barangay it Seminara, Tinogboc, Alegria, Sibolo, ag Sitio Liwagao.
Masobra sa 7,617 nga pamilya ukon 25,733 nga indibidwal, kon sa siin 450 hay seaweed planters ag 3,649 nga mangingisda ro apektado it oil spill.
Mag-eowas kara, nakabantay man ro medical response team nga ginakaeakipan it mga doctors ag nurses agud nga padayon nga mag-assess sa ikaayong eawas it mga direktang nakahanggop it hugom it langis eabi eon ro mga naga-istar sa coastal areas.
Bilang inisyatibo it gobyerno, may cash for work para sa mga residente agud nga masustentuhan ro andang pang adlaw-adlaw nga kinahang-eanon.
Samtang sa pihak nga parte, tayuyon man ro pag-aeabutan it mga bulig maghalin sa national ag provincial government kon sa siin ginasigurado sigon it mga raya nga uwa it magutuman sa mga apektadong residente.
Ginpahayag dugang ni Train nga kapin sa 9 milyon pesos eon ro nailistang danyos sa seaweeds plantation ag ginaeauman nga madugangan pa sa mga masunod nga inadlaw.
Sa makaron suno kana hay 500 ka sako nga lamang dagat ro nabuoe ag 70 drums it oil spill residue ro natipon.
