KALIBO, Aklan–Welcome kay Senate president ag Vice Presidential candidate Vicente “Tito” Sotto III ro naging desisyon ni Pangueong Rodrigo duterte nga papunduhon eon ro operasyon it e-sabong.
Bangud kara, makabig eon suno kana nga patay ro igapasa nga prangkisa it e-sabong sa senado.
Sa ginpatigayon nga Comelec-KBP PiliPilipinas 2022 forum, ginpahayag ni Sotto nga owa eon sanda it bastante nga tiempo agud nga magpasa it franchise bill kara.
Nagapati man si Sotto nga engkaso nga matalakay, magiging maeawig raya bangud nga paga-istoryahan nanda kon ro e-sabong hay public utility nga nagakinahangean it legislative franchise.
Mag-eowas kara, nagpaguwa eon suno kana it desisyon ro pangueo bangud sa negatibong impact kara sa mga na-adik sa sugae.
Raya hay maskin pa nga binilyon ro ginakita it gobyerno sa e-sabong sa sueod it sang dag-on.
Nasayuran nga ro senado hay nagpatigayon it ap-at nga ka hearings angot sa pagkaduea it masobra sa 30 nga mga indibidwal nga gina-angot sa nasambit nga sugae.
Sa pihak nga parte, engkaso nga paearon sa nasambit nga posisyon, gusto nana nga pangunahan ro Dangerous Drugs Board, Department of Interior and Local Government ukon DILG ag ro Philippine Drug Enforcement Agency (PDEA).
Si Sotto hay ro running mate ni Partido Reporma’s presidential bet Panfilo “Ping” Lacson nga owa nakatambong sa nasambit nga forum.
