KALIBO, Aklan — Sa bisperas it US presidential elections, bukon it uso ro vote buying kapareho sa nagakatabu sa Pilipinas kada eleksyon .
Raya ro ginpahayag ni Bombo International Correspondent Pinoy Gonzales it Texas, USA.
Apang suno kana nga nakasanayan eon it mga democrats nga kada eleksyon hay ginapangtipon ro mga homesless ukon mga palaboy agud nga buligan nga madali nga makaboto.
Ginpahayag nga maskin nga manggaranon nga nasyon ro America, kapareho sa Pilipinas hay libu-libo man sa andang mga pumueuyu idtu ro owa it maistaran ukon sa kalye naga-istar ag manabang porsiyento eamang sa mga raya ro nagapartisipar kada eleksyon.
Ginatinguhaan sigon makaron nga dag-on it gobyerno it Amerika nga pataason ro numero it mga makaboto nga homeless.
May mga ginapakalhit sigon nga mobile trailer ukon mga bus nga ginapadaea sa nagkaeain-eain nga komunidad agud nga engganyuhon ro mga palaboy nga magboto .
Dugang pa nga nagabutang man it mga ballot drop box maeapit sa mga homeless shelter, food bank, ag taeatapan it health and human services.
Mabudlay sigon kon amat sa mga palaboy nga makaboto bangud sa kawad-an it address .
Dikara suno kana naga-offer it bulig ro mga democrats agud nga mataw-an it bayad ro mga homeless nga makabo-oe it ID ukon sa state motor vehicle office nga makabig nga matsa drivers license maskin nga owa sanda nagamaneho.
Dugang pa ni Gonzales nga kaeabanan sa mga republicans hay mga professional ag may mga trabaho kapareho it mga Filipino-Americans.
