KALIBO, Aklan — Gin promisa it nag daug nga barangay chairman sa Balabag, Boracay nga pagarapuson ro problema sa basura ag pagataw-an it igtaeupangud ro mga kontrobersiyal nga iligal nga tubo sa andang nasakupan nga direktang nagapagowa it maitom ag mabahong tubi sa baybayon
Sa interview it Bombo Radyo, gin pahayag ni Jason Talapian, bag-ong nailihir nga barangay captain sa nasambitang lugar, nga uhaw sa pagbag-o ro mga residente dahilan nga gin butang imaw sa pwesto kontra kay Glenn Sacapaño nga magabaylu konta sa anang misis nga si incumbent barangay captain Lilibeth Sacapaño.
Nasayuran nga nagnaba it haeos 40 porsyento ro voters turn-out sa nasambitang barangay nga may 7,371 nga nakarehistrong botante.
Mag eowas sa Balabag, nagnaba man it pilang porsyento ro numero it mga bomoto sa Manocmanoc nga may registered voters nga 11,170 ag Yapak nga may unang 3,570, kun siin kaabuan sa mga raya hay nag uli eon sa andang tagsa ka mga probinsiya bangud sa temporaryong pagpasara sa isla.
Samtang, gin bayluhan man ni kagawad Nixon Sualog si Joel Gelito, dating kapitan sa Manocmanoc nga nagpungko sa pwesto sa sueod it napueong dag-un.
Sa Yapak, naga pabilin sa gihapon nga barangay chairman si Hector Casidsid kontra kanday kagawad Marlyn Villaresis ag dating barangay captain Anselmo Casidsid.
Ro isla it Boracay hay may 56,444 nga residente ukon 71 porsyento it kabilogan nga populasyon sa Malay, Aklan.
