KALIBO, Aklan—Ginpasiguro ni Vice President ag Education Secretary Sara Duterte-Carpio sa pamunuan it Caticlan Elementary School nga pagataw-an it aksyon sa mas madali nga tiempo ro ginahinyu nanda nga pag-relocate it andang eskwelahan.
Suno kay Caticlan Elementary School Public Information Officer ag Teacher III Jenefe Salibio nga ginpahayag it bise presidente sa andang school principal nga si Ligaya Aparicio nga makikipag-angot ro Department of Education sa andang local government unit.
Mabuhay eon sigon nga tiempo nga ginaduso ro relocation it eskwelahan bangud nga indi mapatuman ro pagpatindog it dugang nga mga school buildings ag pasilidad tuga it konsiderasyon nga katabok kara ro Godofredo Ramos Airport nga mas kilaea man sa tawag nga Caticlan Airport.
Samtang, ginpahayag dugang ni Salibio nga owa it ginpahaum nga programa ro eskwelahan sa pagbisita it bise presidente bangud nga owa sigon raya naila it bonggang preparasyon.
Nasayuran nga ginpangunahan it DepEd Secretary ro pagpanupod it school supplies ag dental kits sa haeos 350 nga mga learners it Caticlan Elementary School umpisa Grade 1 hasta Grade 3.
Ro distribusyon it “PagbaBago” bags nga may sueod nga mga school supplies ag dental kits hay sambilog sa mga flagship programs it Office of the Vice President.
Gintaw-an man sigon kara it importansiya ro papel it ginikanan agud nga mapahauman ro puturo it andang mga inunga.
Naging kuntento man raya sa ginplastar kana nga mga interventions nga gina-obra it eskwelahan agud nga mapun-an ro ginatawag nga learning gaps nga epekto it covid pandemic.
