Nagdihon it mosyon ro grupo it mga abogado sa Korte Suprema para kuwestiyunon ro pagtaeana kay Senator Chiz Escudero bilang Presiding Officer sa impeachment trial sa Senado.
Sa andang 16-panig nga Very Urgent Manifestation with Motion, gin-engganyo nanday Atty. Israelito Torreon ag waeong iba pang abogado ro Korte Suprema nga magpaguwa it Temporary Restraining Order ukon Status Quo Ante Order kontra sa impeachment trial ni VP Sara.
Ginpunto it mga abogado nga ro amendments sa Rules of Procedure on Impeachment Trials nga gin-aprubahan sa session ko Hunyo 3 — nga nagakuwestiyonman bangud sa 12 miyembrong quorum eang — hay owa it gahum.
Ginpamilit nanday Torreon nga ro Senate President eang ro pwedeng magdumaea sa mga impeachment trial, mag-eowas kun ro President mismo ro ginabista nga dapat hay pamunuan it Punong Mahistrado.
Gindihon ni Sen. Ronald Miguel Zubiri ro Resolution No. 430 sa sesyon ko Hunyo 3 nga nagatuyo nga amyendahan ro Rule II it Rules of Procedure agud nga pasugtan ro pag-ilihir it ibang senador, sa baylo nga ro Senate President, nga magdumaea sa impeachment trial pinaagi sa boto it mayorya, ag raya hay gin-aprubahan man it Senado sa mismong adlaw.
Sa manifestation, ginpahayag it mga abogado nga owa nagsunod sa tamang proseso ro pagbag-o sa mga patakaran, kaibahan ro one-day notice rule para sa anumang amyenda, ag ro mga pagbag-o hay gin-aprubahan it Senado bilang sangka legislative body ag bukon it bilang sangka impeachment court.
Bangud kara, ginpahayag it kampo ni Duterte nga nabutang sa aeang-aeang nga sitwasyon ro gahum it presenteng impeachment trial.
Dugang pa nga kon ro nagadumaea hay owa it constitutional authority, ro proceeding hay indi eang maka-apekto sa anang posisyon kundi sa kada sentensiya, mandu, ebidensya, ag desisyon sa proseso nga ginhimo sa idaeum it anang pagdumaea.
