Nagaeaum si Vice President Sara Duterte nga mataw-an man it kahigayunan sa pilang adlaw ro mga miyembro it lesbian, gay, bisexual, transgender, queer ukon LGBTQ community para mapakaslan ro andang partners ag mataw-an it proteksiyon sa idaeom it laye.
Ginpahayag raya it Bise-Presidente kasunod it pagselebrar it Valentine’s day kahapon ag nagserbing guest speaker sa ika-62 free mass wedding nga ginsponsor it Parañaque City local government ag nagpaabot it pagtamyaw sa 64 nga bag-ong kasal.
Ginbunyag man ni VP Sara nga natalakay eon nana ro nasambit nga proposed LGBTQ+ protection kay Senator Robin Padilla.
Tyempo eon sigon para mataw-an man it kahigayunan ro mga raya nga ma-eksperyensyahan ro pagpakasae apisar nga bukon it sa ibang nasyon.
Nasayuran nga sa ibang nasyon ginakilaea eon ro pagpakasae sa mga magkapareho it kinatawo.
Dugang kara, ginpunto ni VP Sara nga ginakilaea eon makaron it sosyudad ro maabu nga genders ukon kasarian rason nga nagaeaum raya ro mga miyembro it LGBTQ+ community hay mataw-an man it legal protection.
