KALIBO, Aklan—May tyansa nga makaapela sa Supreme Court si Vice President Sara Duterte kon engkasong ma-convict sa nagapadayon nga pagbista kana sa ginapangatubang nga impeachment case agud nga kwestyunon ro voting threshold nga ginsunod it mga senator-judges.
Una kara, ginpanabaan it Senado nga nagaserbing impeachment court ro numero it boto nga kinahang-ean agud nga masentensyahan ro bise president sa impeachment trial.
Suno kay Rev. Fr. Atty. Jude Rebaldo it St. Isidore The Farmer Nabas Parish nga kon sundon it impeachment court nga ro huyapon eamang sa pagtumod it voting threshold hay ro mga senator-judge nga nagapartisipar ro pwedeng bumoto sa pagbista ag kon ma-convict si VP Sara hay pwede imaw nga makadaeagan sa Korte Suprema agud nga iprotesta ro naging desisyon it impeachment court.
Nasayuran nga ap-at sa 24 nga senator-judges ro posibleng inde makapasakop sa mga proceedings ag posibleng inde man makaboto.
Halin sa dating 16 nga boto, 14 nga boto eon lang ro kinahang-ean agud nga maabot ro two-thirds requirement para sa conviction.
Dugang pa ni Rev. Fr. Atty. Rebaldo, kon ideklara nga unconstitutional it kataas-taasahang hukuman ro ginsunod nga voting threshold, back to zero ro tanan apang kon magdaog ro Senado, posibleng maabo man ro ikutana kanda.
Suno sa Konstitusyon, kinahang-ean ro two-thirds vote it impeachment court agud masentensyahan ro sangka opisyal.
Apang, pwede man nga magbag-o ro kinahang-ean nga boto kon madugangan pa ro mga senator-judge nga indi makapasakop sa mga masunod nga proceedings.
Sa kaulihanan suno kay Atty. Rebaldo, sa Supreme Court magahalin ro pinal nga desisyon kon engkaso gidman nga dumaeagan kanda ro bise president.
