Indi sa gihapon magatambong si Vice President Sara Duterte sa ika-ap-at nga State of the Nation Address (SONA) ni Pangueong Ferdinand Marcos, Jr. sa Hulyo 28.
Nagpaabot eon it mensahe ro Office of the Vice President (OVP) sa Kongreso ag ginhambae nga indi imaw maga-agto sa SONA.
Raya hay ginkumpirma man mismo ni House Secretary General Reginald Velasco ag ginhambae nga nabaton nanda ro mensahe halin sa opisina it bise presidente nga nagapabutyag nga indi imaw maga-attend sa SONA.
Ginpasiguro man ni Velasco nga haum man ro Kongreso nga batunon ro bise presidente, engkaso nga magabag-o ro anang isip ag magatambong sa aktibidad.
Suno kana nga may nakareserbang pungkuan para kana ag magataeana sanda it holding room para sa bise presidente ag anang mga tawuhan, bangud nga ginakabig sigon raya nga sangka institutional guest, kaibahan ro mga pinuno it nagkaeain-eain nga ahensiya it gobyerno ag mga mahistrado it Korte Suprema.
Sa masobra sa 200 nga imbitasyon nga ginpadaea it Kamara sa mga VIP ag iba pang mga bisita sa SONA hay si VP Sara pa eamang ro nagpaabot nga indi makatambong.
Kaibahan sa gin-imbitahan si dating pangueong Rodrigo Duterte nga idtu sa The Hague, Netherlands.
Ro imbitasyon kay Duterte hay igapadaea sa anang baeay sa Davao City.
Ko nagtaliwan nga dag-on hay gin-isnab man it bise presidente ro SONA it Pangueo.
Ginpahayag pa it Vice President nga igataeana nana ro anang kaugalingon bilang ‘designated survivor,’ nga naging kontrobersiyal ag umani it mga pagbatikos.
