Sa pihak it waea-tou nga importation it asukar sa nasyon, indi sa gihapon mabatyagan ro pagstable it presyo kara sa merkado publiko.
Nagapabilin nga sa Western Visayas eamang nagahalin ro suplay it mga asukar nga naga-abot sa Kalibo Public Market.
Raya ro ginpahayag ni Betty Robelo sangka negosyante it asukar sa Kalibo Public Market.
Suno pa kana nga owa sanda nagaeaum nga makabaton it suplay maghalin sa nasambit nga mga imported nga asukar bangud mas ginaprayoridad sigon nanda ro kaugalingon nga produkto it nasyon.
Apisar nga mas barato sigon ro presyohanan it mga imported nga asukar mas nagasalig gihapon sanda sa kalidad it asukar nga nagahalin sa Western Visayas.
Angot kara, may pagnaba ro presyo it brown sugar nga kung siin ro dating P85 hasta sa P86 kada kilo hay nagaabot eon lang sa makaron sa kapin P80 kada kilo, kamana man sa washed sugar nga nagadaeagan eon lang sa makaron sa kapin P82 kada kilo.
Samtang, nagapabilin man sa P95 kada kilo ro puting asukar.
Sa makaron, nagapabilin nga nagataas-naba ro presyohanan it asukar sa merkado publiko apang nagaeaum ro mga negosyante nga maganaba eon raya sa mga masunod nga inadlaw bangud sa pag-abo it suplay sa nasyon.
