Kun may ‘travel revenge’, matsa owa man nagapaulihi ro pagbalik it mga pasaway.
Pagkatapos nga duea-on ro pag instrikto tuga it pandemya, umalagwa eon ro mga kriminal.
Haeos adlaw adlaw hay may napabalita nga panakawan , pagpang loko ag pagpatay.
Owa it ginapili nga oras ag lugar, basta may mabibiktima, maga-atake sanda.
Rason nga masyadong importante nga kon nagalibot-libot ro mga maeain nga elemento hay naga-ronda man ro mga katapo it otoridad agud nga sanda hay mapugngan.
Apang raya hay bukon eamang it trabaho it mga awtoridad, kundi nga may amot man kita nga mga pumueuyu.
Raya hay pinaagi sa paglikaw sa kaugalingon nga maeakot sa anumang ilegal nga hilimuon ukon pagpang-gulo.
Ikaywa dahanan ro atong pamilya, siguraduhon naton nga indi sanda mabutang sa aeang-aeang ukon matukso sa paghimo it maeain eabi eon ro mga pamatan-on.
Ikatlo, maging responsableng pumueuyu, maging alerto sa palibot, kun may makadueudang tawo ukon sitwasyon, insigida nga ipahisayod sa natungdan.
Sa mga pasaway man nga pirmeng ginarason ro kapigaduhon sa pag obra it kaeainan, dapat eon nga punduhon.
Owa it anumang rason agud nga magkapit sa patalim.
Mahuya kamo sa mga magueang ukon may kapansanan nga nagasukoe sa kabuhi it patas.
