KALIBO, Aklan—Sa sueod it haeos daywang dag-on nga temporaryong pagpaiway sa mga religious activities bangud sa pandemya, uman nga igapatuman it simbahang katolika ro nakaangdanan nga aktibidad kada semana santa.
Sambilog eon kara nga eubus nga nalipay ro mga deboto partikular ro may mga panaad kon sambilog nga ginpreparahan hay ro pagbalik it prosisyon it mga santos nga nakasakay sa karo nga igalibot sa bilog nga banwa it Kalibo.
Mag-eowas kara, ginpasugtan eon man ro pagsaka sa mga bukid partikular sa Manduyog Hills sa banwa it Banga ag ro ginadayo nga Tigayon Hills kada Huwebes ag Biyernes Santo agud nga magpatigayon it via crusis.
Sa pihak kara, ginakabig makaron nga adlaw nga Palm Sunday ukon adlaw it lukay bilang pagsueod ni Hesus sa Jerusalem rason nga waea-tuo ro nagabaligya it mga lukay agud nga pagabinditahan sa sueod it santos nga misa.
Suno kay nanay Placida Villanueva it Brgy. Bakhaw Norte, Kalibo, haeos 30 anyos eon imaw nga nagabaligya it lukay kada semana santa sa prente it Kalibo Cathedral kon siin naging panaad eon man nana ro pagpabindita it lukay nga ginabutang sa anda nga altar.
Eubus man nanda nga ginkalipay ro paghaeoga sa hueag it tawo bangud nga haeos kada dominggo hay abu eon ro nagapadueong sa simbahan agud personal nga makaatendir it misa nga ko una sa kasagsagan it pandemya hay sa virtual masses eamang ro mga raya nagasimba.