KALIBO, Aklan—Naga-abot eon sa 8 nga barangay sa banwa it Kalibo ro gindeklarang drug free it Philippine Drug Enforcement Agency (PDEA).
Ginpahayag ni P/Lt. Col. Richard Mepania, hepe it Kalibo Police Station nga sa kabilugan nga 16 nga barangay nga nagpaidaeum sa drug clearing program, 8 ro ginbo-oe sa listahan it droga.
Ro deklarasyon hay base sa ginpatigayon nga deliberasyon it Regional Oversight Committees sa siyudad it Iloilo nga gintambungan ni Kalibo Mayor Engr. Emerson Lachica ag ni P/Lt. Col. Mepania.
Kaibahan sa nadugang sa listahan hay ro barangay Tinigaw ag Bakhaw Norte.
Nauna eon nga gindeklarang drug cleared ro mga barangay it Briones, Caano, Mobo, Nalook, ag Linabuan Norte.
Ginpasiguro pa it opisyal nga sa Pebrero it masunod nga dag-on hay madugangan pa ro mga barangay nga malimpyuhan sa droga.
Target sigon nanda makaron nga madakpan ro mga bag-ong na-identify nga mga drug personalities sa banwa it Kalibo.
Ginpaathag ni Mepania nga agud nga madeklara nga “drug-cleared” ro sangka barangay , kinahangean it mga raya nga ma-comply ro tanan nga mga requirements ag parameters nga gintaeana sa idaeum it Dangerous Drugs Board.
Kaibahan sa requirements hay dapat nga owa eon it may naga-eksister nga drug supply; owa it drug den, pusher, user; kamana man owa it drug laboratory.
Dapat man nga aktibo ro partisipasyon it barangay officials sa anti-drug activities; may ginapatuman nga drug awareness, preventive education and information; ag may naga-eksister nga voluntary ag compulsory drug treatment and rehabilitation processing desk.
