KALIBO, Aklan—Arestado ro waeong ka mga indibidwal matapos nga madakpan sa pagpatigayon it illegal nga pagbueo-bueo bandang ala-1:30 it hapon sa Brgy. Aliputos, Numancia.
Ginkilaea ro mga naaresto nga sanday Roberto Arias, 46-anyos, residente it nasambit nga lugar; Andifiel Gerono, 36-anyos it Brgy. Bagto, Lezo; Juriecris Ulid, 26-anyos ag Herbert Constantino, 29-anyos it Brgy. Marianos, Numancia; Earl Kenneth Fuentes, 29-anyos, Mark Tarantan, 27-anyos ag Bryan Gustilla, 27-anyos it Brgy. Laguinbanwa West, Numancia kamana man si Loyd Iguban, 45-anyos it Brgy. Dongon West, Numancia.
Narekober sa posisyon ag kontrol it mga raya ro kapin sa P25,759 pesos nga kantidad it kwara nga ginamit bilang taya kamana man ap-at ka mga pambueang nga manok nga ginakaeakipan it tatlong ka mga buhi ag sangka patay.
Sa makaron ro nasambit nga mga persona hay una eon sa kustudiya it Numancia PNP para sa nagakaigong disposisyon.
