KALIBO, Aklan—Eowas eon ro waeong ka mga overseas Filipino workers ukon OFW’s nga nakaeakip sa byahe it german military forces halin sa Kabul, Afghanistan paadto sa nasyon it Germany.
Suno kay Bombo International Correspondent Gerry Presto Biasura, tubong Mangaldan, Pangasinan ag sangka construction worker sa Kabul, Afghanistan nga nakahugpa eon sa Germany ro andang eroplano nga sinakyan imaw ro temporaryong nasyon nga ginbakwita kanda it andang kumpanya bilang contingency plan kasunod it pagsakop it Taliban sa Afghanistan.
Suno kana, antes pa man nagmadinaeag-on ro mga Taliban hay nakabaton eon sanda it mga impormasyon halin sa intelligence department nga padayunon it Taliban ro andang pagsakop sa Kabul matapos ro ibang lugar sa nasyon nga nauna eon nandang ginpamugaran.
Bangud kara, insigida sigon sandang ginpaalerto it andang kumpanya para maskin anu oras hay pwede sanda nga makabakwit.
Sa Escaya sigon sanda nag-agi hasta nga nakasakay sa eroplano apang ap-at pa sa andang mga katrabaho ro nagapabilin makaron sa Kabul.
Sa sueod it tatlong dag-on nana nga pagtrabaho sa nasambit nga nasyon hay haeos mga dumueoong nga puti ro target it mga Taliban kon sa siin uwa ro mga raya it patawad kon magpangbomba it lugar ag magpamatay it mga tawo.
